Stórkostlegur árangur?

Fjölmiðlafólk er einkennilegt fyrirbæri. Reyna í sífellu að móta skoðanir fólks - og yfirleitt þá til að koma sér í mjúkinn hjá einhverjum valdamönnum í samfélaginu - já eða yfirmönnum sínum.

Íþróttafréttamenn eru engin undantekning. Hallelújáin í kringum íslenska karlalandsliðið í fótbolta er slík að maður hefur sjaldan orðið vitni að öðru eins. Frábær frammistaða osfrv. þó svo að við höfum ekki unnið neitt með liðinu - nokkurn tímann!

Ein skýringin á þessum látalætum er eflaust sú að eftir mjög dapra frammistöðu íslenska landsliðsins undanfarin 15-20 ár, undir stjórn þriggja íslenskra landsliðsþjálfara, er loks farið að rofa til.

Samt ekkert stórkostlega! Riðillinn sem við vorum í í undankeppni HM var t.d. slakur eins og kom í ljós á sjálfri úrslitakeppninni þar sem Sviss reið ekki feitum hesti frá keppninni, og Króatía svo sem ekki heldur, liðið sem sló okkar menn út í umspilinu.  Og ekki byrja Svisslendingar vel í undankeppni EM, hafa tapað tveim fyrstu leikjunum.

Lars Lagerbäck er að vísu nokkuð glúrinn karl og veit hvernig á að tala við fjölmiðla. Nú flýtur hann á sigrinum yfir Tyrkjum og hrósar íslenska liðinu (og sér?) upp í hástert með því að fullyrða að það hafi leikið betur í þeim leik (amk í fyrri  hálfleiknum) en sænska landsliðið lék allan tímann undir hans stjórn (þriðja sætið á HM t.d.)!

Vandamálið með Lars er hins vegar það sama og var hjá honum með sænska landsliðið, þ.e. valið á liðinu. Einn sænsku landsliðsmannanna, sem að mati flestra átti ekki heima í liðinu, sagði að það væri mjög erfitt að missa sæti sitt í liðinu ef maður kæmist í það á annað borð.

Þetta fylgir Lars karlinum hingað upp á skerið. Sértu kominn í liðið, og færð eitthvað að spila þar, þá geturðu verið nokkurn veginn öruggur um að vera í því þangað til þú kemst á eftirlaun. Gott dæmi um þetta er Birkir Bjarnason sem hefur átt afleitu gengi að fagna með félagsliðum sínum (og er nú komið í lélegt 2. deildar lið á Ítalíu) en á samt fast sæti í byrjunarliði landsliðsins.

Aron Einar er í raun annar leikmaður sem virðist vera í fastri áskrift hjá liðinu, þrátt fyrir að fáum dyljist að sá maður er ekki flinkur í fótbolta. Þriðja dæmið er Kári Árnason en hann hefur þó sýnt þokkalega leiki undanfarið, enda er lið hans loksins komið í sæmilega deild.

Vegna þessarar undarlegu íhaldssemi hafa leikmenn eins og Ari Skúla og Theódór Elmar, loksins þegar þeir hlutu náð í augum þjálfarans, verið að spila í stöðum sem þeir spila yfirleitt ekki. Báðir eru miðjumenn, sem stjórna spili félagsliða sinna í einni af sterkari deildum Evrópu, en sitja nú fast í bakvarðastöðum landsliðins.  

Um Elmar var þetta sagt eftir næstsíðasta leik, en lið hans er nú taplaust í 3. sæti dönsku úrvalsdeildarinnar. Hann lék þar sem framliggjandi miðjumaður:

"Elmar Bjarnason spillede en rigtig flot kamp i Aalborg fredag aften. Var meget bevægelig offensivt, og slog flere gode indlæg. Var en evig trussel mod AaB-forsvaret, hvor han var ud­fordrende og direkte i sit spil."

Já, það er hætt við að liðsuppstilling íslenska landsliðsins, og liðsvalið almennt séð, eigi eftir að koma liðinu í koll í þessum sterka riðli sem það er í. Ætli hljóðið í fjölmiðlunum breytist þá eitthvað, þ.e. þegar illa gengur? Ég efa það. Fjölmiðlafólkið er jú svo undarlega meðvirkt!

Rétt hugarfar skiptir öllu máli

Birkir frábær í fyrri hálfleik?

Þrátt fyrir slakt val á byrjunarliðinu þá vann Ísland 3-0, enda Tyrkirnir arfaslakir.

Jón Daði átti reyndar ágætis leik og gerði fyrsta markið.

Eftir að Birkir Bjarnason var tekinn útaf í seinni hálfleik og Rúrik kom inná í staðinn fóru hlutirnir hins vegar að gerast.

Tvö og þrjú núll á innan við tveimur mínútum!

Við þriðja markið sýndi Ari Skúla sendingarsnilld sína.

Það eina sem skyggir á þennan sigur var spjaldið sem Gylfi fékk fyrir kjaftbrúk. Var ekki Raggi Sig. búinn að vara menn við svona vitleysu?

Annað reyndar sem einnig gerir þennan stóra sigur dálítið beiskan er montið og yfirlýsingagleðin sem mun hrjá íþróttafrétta- og blaðamenn, og fótbolta"sérfræðingana", næstu dagana og vikurnar.

Allt tal um að halda sér á jörðinni og vera ekki að panta strax farmiðann til Frakklands í úrslitakeppnina 2016 mun hverfa í upphrópunum og ýktum lýsingarorðum (svo sem "frábær" og "frábært" sem hljómaði oftar í lýsingunni í kvöld en ég hafði tölu á)! 

Glæsilegur sigur á Tyrkjum í fyrsta leik

Nokkuð sem mátti eiga von á!

Já, þeir eru ekki mikið fyrir breytingarnar blessaðir landsliðsþjálfararnir.

Kári Árnason í miðverðinum en ekki Sölvi Geir - og Birkir Bjarna sem hægri kantur en ekki Rúrik Gíslason!

Eins og kunnugt er leikur Kári í B-deildinni ensku sem þannig er talin sterkari en rússneska úrvalsdeildinni þar sem Sölvi spilar (eða hvað?). [Eitthvað til í því sem Ragnar sagði um þjálfarasleikjuna Kára???]

Þá er ítalska 2. deildin líklega talin sterkari (þar sem Birkir spilar (eða spilar ekki því engar fréttir er af því hvort hann komist í lið Pescara)) en sú danska (þar sem Rúrik spilar reglulega þó svo að hann hafi verið frá um stund vegna meiðsla)  og það þó að Rúrik hafi mikla reynslu af að spila í meistaradeildinni með FCK, en Birkir enga.

Einnig hefðu nú ýmsir viljað sjá langmarkahæsta leikmann norsku úrvalsdeildarinnar, Viðar Örn, sem senter en ekki Jón Daða sem er inn og út úr liði Vikings í sömu deild (og skorar ekki mikið þar).

Og eins og ég hef oft sagt áður. Þetta eru miklir snillingar, landsliðsþjálfararnir okkar.

Lið Íslands klárt - Jón Daði byrjar

Fær Birkir að spila eitthvað meira núna?

Ekki heyrist mikið frá Birki Bjarnasyni eftir að hann var seldur til B-deildarliðs Pescara. 

Reyndar er deildin varla byrjuð ennþá svo ljóst er að Birkir hefur aðeins spilað tvo til þrjá deildarleiki allt þetta ár.

Þrátt fyrir þennan litla leiktíma hefur Birkir leikið alla leiki með íslenska landsliðinu og nær allan tímann í þessum leikjum.

Þá kom lítill spilatími ekki að sök, þó svo að hann kom mjög vel fram í leik Birkis sem var vægast sagt lélegur í þessum leikjum.

Af hverju þá þessi látalæti nú? Birkir fær alltaf að byrja inná, alveg óháð því hvort hann sé í engri leikæfingu eða ekki.

Núna eru nánast allir að spila

21 árs liðið þurfti að lúffa (að venju)!

Ekki er landsliðshópur A-landsliðsins burðugur þessa dagana. Svo lélegur er hann að liðið þarf að fá einn besta mann 21 árs liðsins til liðs við sig, þrátt fyrir að yngra landsliðið sé á sama tíma að leika einn mikilvægasta leik sinn lengi.

Stjórnunin á A-liðinu er að lenda út í algjöra vitleysu, fyrst og fremst vegna liðsvalsins. Búið er að ganga framhjá eldri og reyndari leikmönnum svo lengi að ekki virðist koma til greina að nota þá, jafnvel ekki einu sinni þegar lykilmenn landsliðsins eru meiddir eins og nú er.

Í staðinn er leitað í hóp sífellt yngri leikmanna til að fylla í skörðin.

Hugmyndaleysi landsliðsþjálfarana verður æ meira áberandi. Í undankeppni HM voru við mjög heppnir með riðil, en nú er reyndin önnur og hætt við að árangurinn verður eftir því.

Ánægðan með landsliðsþjálfara á að sama skapi eftir að dvína hratt eftir því sem líður á þessa nýja keppni.

Sigurður Egill í U21 árs liðið

Markmaðurinn sökudólgurinn í þremur markanna ...

Stefán Logi Magnússon markmaður KR virðist hafa átt sök á þremur fyrstu mörkunum, allavega þeim tveimur fyrstu.

Fyrstu tvö mörkin voru úr hornspyrnum. Í því fyrra misreiknaði Stefán boltann sem fór yfir hann. Var hann þá kominn langt frá markinu þegar boltinn kom aftur inn í teiginn og eftirleikurinn auðveldur fyrir Celtic.

Í öðru markinu mistókst Stefáni að slá boltann frá. Skallaði leikmaður Celtic boltann nánast úr hnefanum hjá markmanninum og skoraði.

Þriðja markið var sending fyrir markið mjög nálægt markmanninum sem náði þó ekki boltanum heldur sóknarmaður Celtic. 3-0.

Það vakti furðu margra þegar KR samdi við Stefán Loga fyrir leiktíðina því hann naut ekki mikils álits í Noregi eftir slaka frammistöðu undanfarin ár. Hann komst ekki lengur í liðið hjá Lilleström, var ekki einu sinni í leikmannahópnum ef ég man rétt, og var svo lánaður til B-deildarliðs Ullensaker/Kisa sem var og er botnlið í deildinni.

Það hlýtur að vera farið að hitna sætið undir Rúnari þjálfara eftir þetta afhroð og eftir slakan árangur í deildinni hér heima. Einnig hlýtur það að sitja í mönnum hvernig liðið klúðraði meistaratitlinum í fyrra. En KR-ingar sparka jú ekki eigin manni, eða hvað?

Mörkin í leik Celtic og KR (myndskeið)

Hvernig væri nú að horfa í egin barm?

Þessi Heimir er að verða helvíti góður í að kenna leikmönnunum um en ekki sjálfum sér. 

Honum væri nær að að stunda smá sjálfsgagnrýni og spyrja sjálfan sig hvort valið á leikmönnum hafi verið rétt. Þarna voru menn að spila sem voru greinilega í lítilli leikæfingu og því ekki neinir sérstakir vinir boltans. Aron Einar var t.d. slakur í fyrri hálfleiknum og Gylfi Þór einnig en átti þó stoðsendinguna sem gaf markið í seinni hálfleiknum.

En sá sem er greinilega illa ryðgaður var Birkir Bjarnason. Ekki furða því hann hefur varla leikið neitt sem heitið getur undanfarin eitt til tvö ár eða frá því hann fór til Ítalíu. Samt er hann látinn byrja inná í öllum landsleikjum og yfirleitt spilað allan leikinn þrátt fyrir að lítið komi út úr honum.

Þá er ástæða til að spyrja sjálfan sig hvort liðsuppbygginin hafi verið rétt. Að láta Emil Hallfreðsson spila út á kanti hlýtur að teljast vafasamt en hann er líklega sá leikmaður landsliðsins sem er í hvað bestri leikæfingunni og besta forminu. Einnig sýndi Helgi Valur það, eftir að hann kom inná í síðari hálfleik, að hann átti að byrja leikinn. Leikur íslenska liðsins batnaði nefnilega mjög við innkomu hans.

Annars er lítið um leikinn að segja. Hann og hinir æfingarleikirnir sýna að þetta landslið er ekki líklegt til afreka í komandi undankeppni EM - nema að landsliðsþjálfararnir kúvendi og fari að nota leikmenn sem eru að spila með félagsliðum sínum.

Ég held þó að það sé borin von. Lars er jú þekktur fyrir það að halda "tryggð" við sömu leikmenn þó þeir standi sig alls ekki, einnig með sænska landsliðinu á sínum tíma. Heimir virðist ekki ætla að breyta þar miklu, enda er samband þeirra þjálfaranna "náið".

 

Bæta þarf hugarfarið

Hvar er Jón Daði?

Fyrir leikina gegn Austurríki og Eistlandi var búið að gefa út að Jón Daði Böðvarsson væri tilgengilegur í báða leikina, öfugt við flesta þá sem eru að spila í Noregi.

Samkvæmt rafrænu leikskránni er hann hins vegar ekki í liðinu. Hvað veldur? 

Rafræn leikskrá fyrir Ísland-Eistland

Birkir Bjarnason

Trú landsliðsþjálfaranna á Birki Bjarnasyni er næstum aðdáunarverð. Er slíkt trygglyndi eflaust nær einsdæmi í knattspyrnusögunni. Birkir lék alla leikina í undankeppni HM og hélt t.d Aroni Jóhannssyni út úr liðinu þrátt fyrir að hafa fengið fá tækifæri með félagsliði sínu, Sampdoria.

Eftir HM hélt þessi einstaka tryggð áfram en hann var í byrjunarliðinu í vináttuleiknum gegn Wales. Því miður hefur Birkir ekki notið þessarar tryggðar hjá Samp­doria en fyrir landsleikinn hafði hann verið á bekknum hjá félagsliðinu í sex leiki án þess að spila nokkuð og einu sinni ekki í leikmannahópnum (sem er mjög stór á Ítalíu eða allt að heilu liði). Hann kom hins vegar inná í tveimur leikjum og lék í alls 33. mín. Aðeins einu sinn var hanni í byrjunarliðinu og lék þá í 45. mín. Þetta gerir alls 78 mín. í 10 leikjum í deildinni fyrir leikinn gegn Wales. Hann lék svo allan leikinn í bikarleik sem tapaðist.

Um þetta leyti vermdu sex landsliðsmenn bekkinn hjá félagsliðinum sínum svo landsliðið var í lítilli leikæfingu þegar það mætti Walesverjum. Eftir tapleikinn gegn Wales fékk Birkir þessa einkunn hjá einum miðlinum: ”Náði ekki að setja mark sitt almennilega á leikinn.”

Eftir það og fyrir leikinn gegn Austurríki um síðustu helgi lék Sampdoria fjóra leiki. Þrjá þeirra var Birkir á bekknum allan leikinn en lék einn og hann allan. 

Þetta gerir alls 14 leiki í ítölsku deildinni eftir undankeppni HM. Þar af sat Birkir á bekknum allan tímann í 10 leikjum. Hann lék einn heilan leik og kom svo inná í þremur leikjum þar sem hann lék í tæpar 80 mín.. Tryggðin og trúin á Birki er hins vegar mun meiri hjá landsliðsþjálfurunum en hjá þjálfara Sampdoria því þrátt fyrir þessa litlu leikæfingu lék hann allan leikinn gegn Austurríki (en fékk reyndar ekki góða dóma fyrir leik sinn)!!

Og enn er Birkir í byrjunarliði íslenska landsliðsins og nú í fremstu víglínu!!!!!!! Vitið þér enn eða hvað?

 

Byrjunarlið Íslands gegn Eistlandi

Biðu í hálftíma eftir 20 mín. fundi!

KSÍ virðist hafa unun af því að hafa íþróttafréttamenn að fíflum!

Blessaðir grænjaxlarnir mættu samviskusamlega kl. 14 á fundinn, sem átti að byrja þá.

KLSÍ liðið lét hins vegar ekki sjá sig fyrr en 14.30 og sögðu fátt eða ekkert nýtt, enda stóð fundurinn aðeins í 20 mínútur.

Menn hljóta að hafa spurt sig eftir á hvort verið væri að hafa þá að ginningarfíflum, þ.e.a.s. ef þeir hafa einhverjar kvarnir í hausnum! 

Miðað við hvernig skrifað er um landsliðið á íþróttasíðum fjölmiðlanna og fjallað um það í ljósvakamiðlunum virðist kvarnirnar ekki vera til staðar - ekki frekar en hjá knattspyrnuforystunni.

Ætli þetta sé spilltasta sport í heimi (sbr. skandalana í kringum Qatar og Brasilíu)?

Fundur Lars og Heimis í beinni