"heitt í hamsi"?

Var ráðherranum virkilega heitt í hamsi - og yfir hverju? Kannski vegna yfirstandandi þjóðarmorði á Palestínumönnum á Gaza, þar sem hundruð barna og almennra borgara eru drepnir á hverjum degi? Kannski vegna árásar Ísraelshers í gær á lest sjúkrabíla sem voru að flytja limlesta Palestínumenn, konur og börn á sjúkrahús í borginni?

Það er reyndar fleirum heitt í hamsi vegna þess síðarnefnda. Framkvæmdastjóri Sameinuðu þjóðanna, Antonio Guterres, er gjörsamlega miður sín vegna árásarinnar enda liggja limlestir líkamar farþeganna eins og hráviðri á götunni.
En Birgir Þórarinsson furðar sig á því að palestínskur ráðherra sé reiður vegna þessa, enda hefur Birgir þessi réttlætt fjöldamorð Ísraelshers á palestínskum almenningi með þeirri afsökun að Ísrael hafi "rétt á að verja sig"!

Og það gera fleiri Ísraelsvinir eins og flestum er kunnugt.
Eitthvað annað hljóð hefði nú heyrst ef Rússar hefðu gert slíkt hið sama í Úkraínu.

Já, hræsnin mun síst þér sóma, sagði skáldprestur einn eitt sinn, orð sem eiga einkar vel við um alþjóðastjórnmálin þessa dagana.

Palestínskum ráðherra heitt í hamsi

Skýrsla vísindanefndarinnar um jákvæð áhrif hlýnunar

Í þessari frétt um fjórðu skýrslu Vísindanefndar um loftlagsbreytingar er eitt jákvætt nefnt sem er þetta: "Auk­in fram­leiðni gróðurs mun hafa já­kvæð áhrif á land­búnað". Annars er allt á neikvæðum nótum.

Ólíkt fjölmiðlunum hef ég gert úttekt á jákvæðum afleiðingum hlýnunarinnar, ekki þeim neikvæðu, sem og því sem frekar bendir til kólnunar undanfarið en hlýnunar. Þetta er byggt á sjálfri skýrslu nefndarinnar (þáttum í henni sem fjölmiðlarnir nefna ekki). Feitletranir eru mínar sem og flestir hornklofarnir [...].
Fyrst er það spáin: "Niðurstöður líkanreikninga benda til þess að hlýnun verði meiri norðan við landið en sunnan við það. Í mörgum líkönum gætir tímabundinnar, staðbundinnar kólnunar. Jafnvel þó að hlýni á öldinni í öllum sviðsmyndum og flestum líkönum, gætir tímabundinnar, staðbundinnar kólnunar í mörgum þeirra. Slík kólnun er algengari suður af landinu og gætir skemur í heitari sviðsmyndum. Í 85 til 95% líkana gætir hennar skemur en 20 ár.
Um fornt veðurfar á Íslandi - og núna: "Síðustu ár hefur hægt á þessari hlýnun".
Um Norður-Atlantshaf: "Markverð kólnun [...] varð á hafsvæði suðvestur af landinu á öðrum áratug þessarar aldar".

Um jöklana: "heldur hefur hægt á rýrnun þeirra eftir 2010."

Um áhrif á náttúruna. Hið neikvæða nær eingöngu talið upp og varla (eða ekki) minnst á það jákvæða. Þó er hér smá skíma: “Jafnvel þó að markmið Parísarsamningsins, um að halda hnattrænni hlýnun innan 2°C, náist munu ræktarskilyrði hér verða gjörbreytt í lok aldarinnar frá því sem nú er. Síðustu ár var hitafar slíkt að rækta mátti korn til skepnufóðurs á helmingi láglendis. Raungerist hlýrri sviðsmyndir verður hægt að rækta það til manneldis á nær öllu ræktarlandi.”
Það sést einnig í smá ljós í lýsingunni á hlýnun hafsins: “Frá 1995 til 2020 hefur hlýr og selturíkur Atlantssjór verið ráðandi fyrir norðan land. […] Aukning hefur orðið á magni svifþörunga, bæði á Íslandsmiðum og á stóru svæði suður af Íslandi. […] Fyrir norðan land hafa orðið breytingar á magni og útbreiðslu mikilvægra dýrasvifstegunda með hækkandi hitastigi sjávar. Þar hefur hlutur rauðátu aukist”. Tekið skal fram hér að þessi gróður og smádýr eru nauðsynleg fyrir fiskveiðar landsmanna.
Og afleiðingarnar: “Hækkandi hitastig á íslenska landgrunninu hefur leitt til breytinga á útbreiðslu margra fisktegunda. Tegundir, til dæmis ýsa, sem hafa verið við nyrðri mörk útbreiðslu sinnar á Íslandsmiðum og fundist að mestu í hlýja sjónum sunnan og vestan við landið, hafa stækkað útbreiðslusvæði sitt til norðausturs.” Þetta á almennt við um botnfisktegundir (svo sem þorsk) sem og um uppsjávartegundir eins og síld og makríl.
Hins vegar hefur kólnun sjávar suðvestan við landið haft neikvæð áhrif: “Nýliðun margra hlýsjávartegunda, svo sem humars, blálöngu og skötusels, hefur minnkað mikið á undanförnum árum. Þessa neikvæðu þróun má meðal annars rekja til breyttra umhverfisskilyrða í hafinu síðastliðin 20 ár. Um er að ræða tegundir sem halda sig aðallega í hlýjum sjó við suður- og vesturströndina.”

Í kaflanum um atvinnuvegi koma einnig fram jákvæð áhrif hlýnunarinnar: “Loftslagsbreytingar munu hafa áhrif á ræktun nytjaplantna á Íslandi. Ræktunaröryggi mun aukast og nýjar plöntur teknar til ræktunar í landbúnaði, garðyrkju og skógrækt. Vegna breyttra ræktunarskilyrða mun jarðrækt á fæðu-, fóður-, viðar- og orkuplöntum aukast.”

Í kafla um byggða innviði er flest neikvætt tínt til en þó eru þar ljósir punktar: “Rýrnun jökla vegna loftslagsbreytinga hefur mikil áhrif á vatnsaflsframleiðslu á Íslandi. Sú aukning, sem þegar hefur átt sér stað, hefur verið nýtt í núverandi kerfi vatnsaflsvirkjana og miðlana þeirra”.
Einnig þetta: “Hlýnun getur dregið úr eftirspurn eftir orku til húshitunar”.
Sömuleiðis þetta: “Loftslagsbreytingar hafa áhrif á vegasamgöngur […] Þær geta […] dregið úr þörf á snjómokstri”.

Aftur um hafísinn: “Hafís á siglingaleiðum nærri Íslandi hefur dregist saman á undanförnum áratugum […] Verði hnattræn hlýnun á bilinu 1.5–2.0°C er líklegt að sumarhafís hverfi að mestu af Íshafinu sum ár, en hlýni meira en 3°C muni það gerast flest ár. Dragist hafís verulega saman opnast nýjar siglingaleiðir um Íshafið.”

 

Almennt einkennir þessa skýrslu krafan um aukið fjármagn til rannsókna á áhrifum loftlagsbreytinganna, m.a. til þeirrar stofnunar sem stendur að skýrslunni!

Lykiláherslan nú er á aðlögun en ekki á það að reyna að stöðva hlýnunina eða draga verulega úr henni eins og áður var! Slagurinn tapaður?

https://acrobat.adobe.com/link/review?uri=urn%3Aaaid%3Ascds%3AUS%3Adf25e307-8696-3b8c-bd79-ae589f8d1953

„Farin að hríslast um allt þjóðfélagið“

Aðeins neikvæð áhrif?

Ef lesinn er þessi útdráttur Moggans á samantektarskýrslu vísindanefndar um loftlagsbreytingar gæti maður haldið að áhrif breytinganna séu einungis neikvæð hér á landi og við landið. En er það svo?
Með hlýnandi veðurfari eykst hagsæld bæði til sjós og lands. Aukin fiskgengd verðmætra tegunda eins og makríls við hlýnun sjávar er til marks um það auk þess sem hafísinn, landsins forni fjandi, hefur ekki gert sig heimankominn mörg undanfarin ár. 
Á landi hefur hlýnunin m.a. haft þau áhrif að kornrækt hefur aftur hafist eftir margra alda hlé. Vor og haust hafa og lengst til muna þannig að vaxtartími gróðurs hefur aukist mikið og landið gróið upp mjög víða. Þá hefur skógrækt eflst mjög sem á kuldatímabilum var óhugsandi. Hlýnandi veðurfar hefur og gert það að verkum að útivist landmanna hefur aukist til muna, fjallgöngur og fleira, auk þess sem ferðamenn njóta góðs af bættu loftslagi, sérstaklega yfir vetrartímann.
Þá lýsti Landsvirkjun því yfir nýlega að bráðnun jöklanna hafi aukið rennsli vatnsfalla og þar með rafmagnframleiðsluna það mikið að sem samsvari heilli stórri virkjun.

Ekkert af þessu er nefnt í úttektinni heldur einungis það hugsanlega neikvæða einhvern tímann í framtíðinni.
Svo er það ábyrgð okkar gagnvart öðrum þjóðum. Nýleg skýrsla Alþjóðabankans sýnir að mjög hefur dregið út fátækt í heiminum á síðustu 20 árum, og þá væntanlega m.a. vegna bættra ræktunarskilyrða matvæla.
Svo hver er þá váin hræðilega sem er verið að innprenta hjá almenningi?

Breyta náttúrufari og lífsskilyrðum á Íslandi

Morðið á Kamban

Ef nafnið Egon Al­fred Høj­land er gúgglað kemur aðeins upp ein persóna, sem var þingmaður Miðdemókrata á áttunda áratugnum. Hann var fæddur 1916 þannig að þetta passar alveg. 

Þessi flokkur var borgaralegur miðjuflokkur eins og nafnið gefur til kynna, svo það er óhætt að efast um að þessi maður hafi verið mjög róttækur anti-nasisti, og sem einnig má spyrja sig um dönsku andspyrnuhreyfinguna sem slíka. 

https://da.wikipedia.org/wiki/Egon_H%C3%B8jland

Sama má segja um Danina sjálfa á árunum fyrir stríð og fyrstu ár stríðsins. Fyrir stríðið þóttust þeir óhultir fyrir Þjóðverjum (þeir væru vinir þeirra þó svo að nasistarnir væru við völd) og létu herinn drabbast niður. Þeir voru og samvinnuþýðir til að byrja með í stríðinu meðan stríðsgæfan var með Þjóðverjum, sendu m.a. 60.000 manns til að berjast með þeim á austurvígstöðvunm (þá var það gegn helv. kommunum), en voru fljótir að snúa við blaðinu þegar stríðsgæfan brást nasistunum.

Við sjáum svipað rússahatur Dana nú (óvinurinn heitir Putin nú, ekki komminn) en þeir eru einna þjóða duglegastar að styrkja Úkraínu gegn Rússum. Þá skiptir engu máli hversu spillt úkraínsk stjórnvöld eru eða hvernig er farið með þjóðernisminnihlutana í landinu.

Annars má benda á mjög góða ævisögu Kambans eftir Svein Einarsson fyrrum Þjóðleikhússtjóra, þar sem stórlega er efast um að Kamban hafi verið hliðhollur nasistum.

Banamaður Kambans nafngreindur í fyrsta sinn

Hver borgar fyrir þetta?

Eitthvað hljóta nú þessir norsku kafarar að kosta. Þar sem þeir eru jú á vegum Hafrannsóknarstofnunar (eða hvað?) er spurning hvort hún þurfi sjálf að kosta þessar aðgerðir - og þar með íslenskir skattgreiðendur - eða hvort að sökudólgurinn, Arctic Fish, beri kostnaðinn? 

Nú er það fullsannað að mikill fjöldi eldislaxa hefur sloppið úr kvíum þessa fyrirtækis í Patreksfirði og fundist ótrúlega víða í vestfirskum og norðlenskum laxveiðiám.
Ekkert heyrist þó frá stjórnvöldum hvort og þá hvaða refsiaðgerðum þetta norska fyrirtæki verði beitt og er allt eins líklegt að eftirmálarnir verði engir. Það má jú ekki flæma erlenda fjárfesta frá landinu (og helst þurfa þeir ekki að borga neitt til samfélagsins)!
Ekkert hefur heldur komið fram hvort eigendur laxveiðiréttinda, þar sem þessir eldislaxar hafa fundist, eigi rétt á einhverjum skaðabótum, hvað þá hve miklum.

Já, undarlegur er þessi heimur okkar orðinn og tjónkunin við peningaöflin, öðru nafni athafnaskáldin, ekki síst ef það eru útlendingar sem eiga í hlut.

Norsku froskmennirnir skutluðu tólf laxa

"óvinaríkið"?

Það er auðvitað alltaf athyglisvert að heyra í ráðamönnum í Washington hverjir séu óvinir Kanans þó svo að það fylgi sjaldan hvers vegna. Í fréttinni er talað um "ögrandi aðgerðir" en ekki nánar tiltekið í hverjum þær séu fólgar.

Kannski að írönsk stjórnvöld hafa gerst svo djörf að standa uppi gegn hagsmunapólitík Kanans þarna eystra. Allir sem gera slíkt eru jú óvinir þessa illa heimsveldis og sýna með því ögrandi aðgerðir. 

Hér er ein gömul, góð vísa um blessaðan Kanann og gæði hans hér á landi sem annars staðar í heiminum: "Hinn amríski stríðsguð sem stendur á verði / hann stuggar burt föntum með logandi sverði" osfrv.

https://glatkistan.com/2021/11/03/lofsongur-2/

 

Fangaskiptum fagnað en varnaglar slegnir

Kaninn og rýra úranið

Bandaríkjamenn hafa notað þetta úran í amk tveimur árásarstríðum þeirra sjálfra, í Bosníu árið 1995 og Kosvó 1999. Á Wikipedia kemur fram að að minnsta kosti 40 ítalskir hermenn létust og milli 500-600 veiktust eftir að komast í snertingu við geislavirkt efni úr úransprengjum Kanans á Bosníu og Kosovo. Ítölsku hermennirnir unnu við að hreinsa upp eftir þessar sprengjur.

https://is.wikipedia.org/wiki/R%C3%BDrt_%C3%BAran

Ekki þarf að taka það fram að þessar árásir voru gegn alþjóðalögum, rétt eins og sífellt er hamrað á um "innrás" Rússa í Úkraínu sem er þó til að vernda rússneska minnihlutann í Austur-Úkraínu, rétt eins og Nató notaði sem yfirskin í stríði þeirra gegn fyrrum Júgóslafíu og núverandi Serbíu.
Í Kósóvustríðinu voru eyðilagðar eða stórskemmdar opinber mannvirki og byggingar eins og brýr, sjúkrahús, skólar, minnismerki og byggingar í einkarekstri. Engar bætur hafa komið fyrir þetta tjón, ekki frekar en í árásarstríði Bandaríkjamanna í Afganistan og víðar.

https://en.wikipedia.org/wiki/NATO_bombing_of_Yugoslavia

Þó hneykslast hin vestræna pressa og pólitíkusarnir yfir framferði Rússa í stríðinu í austurhluta Úkraínu þó þrátt fyrir að það stríð takmarkist að mestu við skotgrafahernað og að Rússar forðist eftir megni að hæfa innviði í Úkraínu og íbúðahverfi.

Ef einhverjir sýna miskunarleysi í þessum átökum, sem og öðrum slíkum sem Vesturlönd hafa verið viðriðin, eru það einmitt þau með morðóðan Kanann í broddi fylkingar.

 

 

 

Umdeild skotfæri skýrt dæmi um „miskunnarleysi“

Siðleysi Kviku banka

Það er greinilegt að stjórnendur íslensku bankanna eru búnir að gleyma Hruninu. Einn aðalleikarinn í hinu "svokallaða" Hruni er t.d. aftur orðinn bankastjóri Kviku banka.

Ferill hans innan fjármálakerfisins er ansi skrautlegur. Félag hans, Ármann Þorvaldsson ehf, var úrskurðað gjaldþrota árið 2011 en gjaldþrotaskiptum lauk ekki fyrr en 2018. Af 5,7 milljarða gjaldþroti fékkst ekki nema 152 milljónir uppí skuldirnar!
Þetta þrot var fyrst og fremst tilkomið vegna lána sem félag Ármanns fékk til að braska með hlutabréf. Hann var þá forstjóri Kaupþings í London og veitti þannig sjálfum sér lánin, amk að hluta. Ætli hann feti ekki aftur í eigin fótspor?

https://www.visir.is/g/20181027647d/5-7-milljarda-gjaldthrot-armanns-thorvaldssonar-ehf

Fyrir þessa viðskiptasnilld og fleiri slíkar er hann nú verðlaunaður í annað sinn með forstjórastöðu í Kviku banka eða eins og stjórnarformaðurinn (og biskupssonurinn) segir réttilega um Ármann: "Reynsla og þekk­ing Ármanns á fjár­mála­markaði ger­ir það að verk­um að hann verður öfl­ug­ur leiðtogi bank­ans sem get­ur unnið af krafti úr þeim fjöl­mörgu tæki­fær­um sem blasa við Kviku".

Hætt er þó við að viðskiptavinum Kviku banka - og þar með Auðar banka, sem kynnir sig sem dóttur Kviku - sé ekki alveg sama um þessa vendingu og íhugi nú að beina viðskiptum sínum annað.
Það myndi þá minna talsvert á stemmninguna í kringum Íslandsbanka og spillinguna þar en þrír stórir viðskiptavinir þess banka hafa ákveðið að færa viðskipti sín annað.
Eins og kunnugt er hafa lengi staðið yfir þreifingar milli Kviku banka og Íslandsbanka um að sameinast. Þar hittir þá líklega skrattinn ömmu sína fyrir ef af verður.

Marinó hættir í Kviku

Kalt eða hlýtt?

Hlýtt á suðvestur- og Suðurlandi en kalt annars staðar á landinu.
Sumir kvarta sem sé yfir kulda meðan aðrir gleðjast yfir hlýindinum.

Í Danmörku hafa fokið fjaðrir vegna ummæla eins pólitíkusins þar í landi sem varð það að orði að allt sé öfugsnúið í pólitíkinni þessi misserin. Meðan almenningur kvartar yfir kuldanum í sumar og vilji eiga meira fé milli handanna, vilja stjórnvöld kaldari sumur og hærri skatta: 
"De fleste af os vil gerne have bedre sommervejr. Mange vil gerne have bedre luft i økonomien. Alligevel fastholder et flertal, at temperaturen skal ned og skatten skal op. Mærkelig tid vi lever i".
Já það er víðar en hér sem er ys og þys útaf engu!

https://www.dr.dk/nyheder/politik/pernille-vermund-forsvarer-oenske-om-hoejere-sommertemperaturer

Hitinn í sjötta „hlýjasta sæti aldarinnar“

Kjarnorkusprengjur á Keflavíkurflugvelli?

Þessar sprengjuflugvélar bera iðulega kjarnorkusprengjur og því þurfa íslensk stjórnvöld auðvitað að spyrjast fyrir um hvort þessar þrjár vélar, sem eru væntanlegar í "æfingar" hér við land, séu með slíkar sprengur innanborðs. Ísland er jú yfirlýst kjarnorkulaust land og á að vera það til framtíðar, rétt eins og hin Norðurlöndin eða hvað?
Þessar vélar eru annars einhver dýrustu morðtól sögunnar, er þá mikið sagt, og kosta skildinginn: https://en.wikipedia.org/wiki/Northrop_Grumman_B-2_Spirit

Undirlægjuháttur íslensku ríkisstjórnarinnar gagnvart Kananum hefur sjaldan eða aldrei verið eins mikill og nú, ekki einu sinni í kalda stríðinu var lagst svo lágt.
Eru ekki kominn tími fyrir VG að taka pokann sinn í þessu stjórnarsamstarfi?. VG hefur jú ítrekað lagt fram þingsályktunartillögur um að landið skuli ávallt vera kjarnorkulaust.
Íhaldið er hvort sem er að hóta stjórnarslitum ef hvalveiðar verða ekki leyfðar að nýju, svo af hverju ekki að taka það á orðinu þegar það gefur þennan höggstað á sér?

 

Bandaríski flugherinn til landsins