Atgervisflótti?

Ég held nú frekar að læknar líti almennt of stórt á sig. Það er ekki mikill söknuður í fólki sem lætur fyrst og fremst stjórnast af græðgi, þ.e. launum sínum, en ekki af því að þjóna fólki (löndum sínum) eins og læknaeiðurinn gengur út á.

Læknar eru og hafa alltaf verið hálaunamenn - og eru ein helsta ástæða þess að heilbrigðiskerfið er að ríða til falls vegna óhóflegs kostnaðar fyrir ríkisvaldið.

Nú þegar harðnar á dalum og ætlast er til þess að allur almenningur herði sultarólina, þá hótar læknastéttina að flytja úr landi ef tekjur þeirra skerðist á einhvern hátt - já helst ef þær halda ekki áfram að hækka von úr viti eins og gerst hefur undanfarna áratugi.

Ríkisvaldið verður að taka á þessum vanda strax. Ein helsta ástæða fyrir háum launum lækna hér á landi, sem hafa verið mun hærri hér lengstum en annars staðar á Norðurlöndunum, er númerus clausus eða fjöldatakmarkanir í læknadeildinni, sem hefur verið notaðar til að halda uppi hinum himinháu launum.

Með því að afnema strax allar takmarkanir á nemendum í deildinni verður auðveldlega hægt að manna allar þær stöður sem losna á næstu tíu árum - og gott betur.

Þá loksins förum við að sjá aftur hugsjónamenn í læknastétt, eins og var hér fyrr á síðustu öld, í stað þessara gráðuga liðs sem þar er nú í yfirgnæfandi meirihluta.

Stöðva verður atgervisflóttann

Athugasemdir

[Tómas Örn Sigurbjörnsson (IP-tala skráð) 16.12.2010 kl. 18:06]

Það eru amk 6 ár síðan numerus clausus var afnuminn.

[Torfi Kristján Stefánsson, 16.12.2010 kl. 18:25]

Gott ef svo er!!! Vonandi fer þá fólk að fara í deildina sem hugsar ekki bara um að græða peninga.

Svo mætti greinilega stytta eða afnema að stórum hluta þetta sérfræðinganám lækna, sem eflaust er hugsað til að halda uppi hásum launakröfum. 12-18 ára nám til að geta starfað sem (heimilis)læknir er auðvitað hreinn brandari.

[Þórir (IP-tala skráð) 16.12.2010 kl. 18:30]

Það er í raun óþarfi að svara þessu hjá þér, það sem rangar staðhæfingar hjá þér eru bara allt of margar...en ég ætla að reyna.

Læknar stjórnast af græðgi:

-Ef að þér væri boðið sex ára grunnnám í einu erfiðasta fagi sem býðst í háskóla og svo eftir það önnur sex - ef ekki fleiri - til sérhæfingar myndirðu þá sætta þig við lág laun eftir það? Erfiðu námi verða að fylgja verðlaun, annars nennir fólk ekki að sækja í það.

Læknar eru á ofurlaunum:

Ég vil taka það fram hér með að nýútskrifaðir læknar eru engan vegin á ofurlaunum, en hinsvegar er vinna lækna með yfir 20 ára nám og reynslu að baki vel borguð.

Læknastéttin hótar að flytja úr landi:

Enginn hefur hótað neinu. Einfaldlega er verið að benda á að vinnuálag er engan vegin í samræmi við laun og það er ekki aðlaðandi aðstaða til að koma til baka aftur. Og ég ætla að leggja áherslu á koma til baka aftur því það eru sáralitlir möguleikar til almennilegarar sérhæfingar hér á landi og því þurfa íslenskir unglæknar að leita út til sérhæfingar. Þar komast þeir í vinnu í gegnum námið og fá húsnæði og koma sér fyrir í því samfélagi sem þeir búa í. Ætlast þú til þess að það sé skylda hvers og eins Íslendings að snúa aftur til landsins að loknu námi þrátt fyrir að það hafi komið sér fyrir fjölskyldu og vinnu að utan?

Lausnin að afnema numerus clausus til að spara pening: (klásusinn sjálfur var afnuminn fyrir um 7 árum en í staðin tekin upp fjöldatakmörkuð inntökupróf)

Það gæti vel verið að það væri auðveldara að komast upp með það að borga fjölmennari stétt lægri laun en sá kostnaður væri rifinn niður fljótlega af auknum kostnaði við að reka deildina. Læknadeildin er ein dýrasta deild HÍ fyrir ríkisstjórnina þar sem mikil og dýr verkleg kennsla fer fram þar. Auk þess eru ekki til nægilega margar deildir til þess að taka á móti fleiri læknanemum en 48 (þess vegna er takmarkaður fjöldi). Því þyrfti að fjölga deildum og það myndi kosta miklu miklu meiri pening heldur en nokkur uppblásin verð fyrir heilaskurðlækna.

Ég ætla svo vinsamlegast að benda þér á að kynna þér málefnin til hlítar áður en þú ferð að fullyrða eitthvað út í loftið.

[Þórir (IP-tala skráð) 16.12.2010 kl. 18:33]

Jesús! Meira!?

Sérfræðinám í læknisfræði er svona langt, elskan mín, vegna þess að hér er verið að kenna fólki að drepa ekki annað fólk. Námið innifelst í einhverjum fyrirlestrum, en aðallega starfsreynslu. Þá eru unglæknar að læra að vera heimilslæknar á reynslunni aðallega og þess vegna þarf að hafa þetta nám langt til þess að fólk sé örugglega komið með nægilega þekkingu.

[Torfi Kristján Stefánsson, 16.12.2010 kl. 22:30]

Alltaf gaman að þessum læknum! Unglæknar á lágum launum?! Spurðu bara hjúkrunarfólkið, sem þarf að kenna þeim allt, hver laun unglæknanna séu í raun miðað við hjúkrunarfólkið.

Fjöldatakmarkanir eru enn við gildi í HÍ. Afnemum þær, fyrst það er að verða svona mikill skortur á læknum!

Heimilislæknar eiga varla mikið á hættu við að drepa annað fólk. Og ættu að geta lært það á styttri tíma en 12 árum (eða 18). Hjúkrunarfræðingar fara létt með að læra það á mun styttri tíma. Kannski er best að leyfa þeim að taka yfir mun meira af starfi lækna til að losna að hluta við þessa hálaunastét.

Hvað eru svo tekjur lækna almennt á mánuði þegar allt er reiknað. Tvær milljónir eða meira? Er virkilega ekki hægt að sætta sig við minna? Sérstaklega á krepputímnum sem þessum?

Varðandi þá lækna sem ílengjast úti mætti vel hugsa sér að láta þá borga hið rándýra læknanám hér heim til baka. Það er ekki eðlilegt að íslenskir skattgreiðendur borgi erlendum ríkjum fyrir að þjálfa og mennta upp lækna fyrir þá!

[Sigurbjörn Sveinsson, 16.12.2010 kl. 23:53]

Það er gott að fá þessar athugasemdir frá Torfa. Þær eru á sömu nótum og stjórnmálamenn hafa svarað viðvörunum lækna nema þeir hafa vafið málflutning sinn í penni umbúðir. Það er hins vegar engin ástæða til að svara þessu bulli. Verkin tala. Ungir læknar hafa þegjandi og hljóðalaust tekið til fótanna. Íslandið verður ekki lengur bjargað með ættjarðarástinni. Við erum ekki á 19. öldinni.

Ég fæ því miður ekki breytt gangi himintunglanna. Ég mun fara á eftirlaun von bráðar án þess að fá neitt við ráðið.   

[Torfi Kristján Stefánsson, 17.12.2010 kl. 09:16]

Takk Sigurbjörn. Það er ekki leitt að vera líkt við stjórnmálamennina. En hvernig ætli standi á því að þeim sé svona "illa" við ykkur læknana? Öfund vegna þess að þið eruð á miklu hærri launum en þeir?

En kannski eru það aðrar ástæður en öfundin. Og kannski eruð þið ekki eins mikil fórnarlömb og þið viljið vera láta.

Ég skora amk á ykkur að sýna smá samábyrgð og deila kjörum með almenningi í stað þess að kvarta og kveina eða flýja land þegar farið er að gera kröfur til ykkar um smá hófsemi.

Í því felst engin kafa um ættjarðarást heldur einfaldlega um siðferðilega ábyrgð. En hana eigið þið læknarnir því miður ekki til, eða hvað?