Undirbúningurinn fyrir EM hafinn

Nú þegar ljóst er að íslenska karlalandsliðið í fótbolta er komið á EM, þó svo að tveir leikir séu eftir í undankeppninni, er kominn tími til að undirbúa sig undir stórmótið næsta sumar.

Það merkilega við landsliðið er að undanfarna leiki, þar af tvo gegn sterkustu liðunum í riðlinum, Tékkum og Hollendingum, hefur liðið ekki verið að leika vel þrátt fyrir sigra í þeim báðum. Þetta viðurkenna bæði þjálfararnir og leikmennirnir ("Ekki okkar besti leikur en ..." o.s.frv.).

Því ætti að vera eðlilegt og raunar sjálfsagt að gera tilraunir í tveimur síðustu leikjunum sem ekki skipta miklu máli fyrir lokakeppnina, a.m.k. í næsta leik, leiknum hér heima gegn Lettlandi.

Landsliðsþjálfararnir hafa verið mjög íhaldssamir í vali sínu á liðinu og ekki gert neinar breytingar á byrjunarliðinu eða landsliðshópnum sem orð er á gerandi. Þó eru margir leikmenn að banka á dyrnar. Einn þeirra er framherjinn Matthías Vilhjálmsson sem er nýkominn til stórliðs norska fótboltans, Rosenborgar.

Mikilvægi hans fyrir sitt gamla lið, Start, sést best á því að eftir að hann var seldur hefur liðið tapað öllum leikjum sínum og er nú komið í bullandi fallhættu. Þessi umsnúningur hefur orðið til þess að þjálfari liðsins er hættur. Hann kennir einmitt söluna á Matthías um slakt gengi liðsins undanfarið:
http://www.vg.no/sport/fotball/start/start-kvitter-seg-med-mjelde-kjipt-aa-ta-farvel/a/23519854/

Matthías er einn þeirra leikmanna, sem ekki hafa notið náðar landsliðsþjálfaranna, sem gæti styrkt sókn íslenska landsliðsins sem ekki var upp á marga fiska í síðasta leik liðsins, gegn Kasakstan (og svo sem ekki heldur gegn Hollandi þó svo að sigur hafi unnist).

Hvernig væri nú að voga örlitlu og fá inn ferskt blóð í liðið?

5-8% miða á EM í sölu hjá KSÍ