"Island nær kollaps"

Þrátt fyrir versta dag Kauphallarviðskipta hjá sér í 17 ár, sjá Norðmenn ástæðu til að benda á að ástandið sé enn verra hjá frændum sínum, Íslendingum:

Sjá http://e24.no/utenriks/article2210232.ece#AF

Þar er m.a. bent á hve íslenska kauphöllin veltir litlu en virði hlutabréfa þar sé aðeins 1500 milljarðar, minna en helmingurinn af virði Statoil-Hydro.

Einnig er bent á að fjórir af  fimm ríkustu fjárfestar á Íslandi hafi tapað meira en helmingi af hlutabréfaeign sinni á síðustu þremur mánuðum! Samanlagt hafi eign þeirra hrapað úr 500 milljörðum króna frá því í byrjun október niður í 300 milljarða nú, eða um eina litla 200 milljarða. Geðveikar tölur það! Að auki er bent á að vegna þess að stór hluti þessa eigna byggjast á lánum megi búast við að þeir svitni þessa dagana.

Einnig er bent á að  fjárfestingar þessara höfðingja erlendis hafi einkum verið í áhættusömustu fyrirtækjum, þeim sem standa hvað verst nú. Sömuleiðis kemur fram að búist sé við sérstaklega slæmu ástandi á Bretlandseyjum á næstu misserum þar sem íslensku fjárfestarnir hafa verið hve ákafastir.

Að lokum er bent á krosseignamyndunina hér á landi sem gerir hættuna ennþá meiri á því að ef einn þessara aðila verður gjaldþrota þá hrynur fjöldi fyrirtækja með þeim.

Einhvern veginn finnst mér vanta umræðu um þetta hér á landi. En það er svo sem skiljanlegt. Hlutaðeigandi vilja forðast að "tala niður markaðinn".

En hvað með fjölmiðlafólkið? Hvaða hagsmuna hefur það að gæta? Er ekki skylda þeirra við lesandann, við almenning, meiri en vinarsambandið við þotuliðið?

 

 

 

Krónan lækkaði