"svo framarlega sem"

Björgvin Sigurðsson bankamálaráðherra hefur vakið mikla athygli í kjölfar bankahrunsins fyrir yfirlýsingargleði, sem ég vil leyfa mér að kalla lýðskrum. Hann lofaði á sínum tíma að enginn bankamaður myndi missa vinnuna, að allar innistæður fólks í bönkunum yrðu borgaðar í topp o.s.frv. Allir vita um efndirnar.

Nú í dag hefur hann haldið áfram með yfirlýsingar sínar og slær þar forsætisráðherra við  í fullyrðingagleðinni. Hann sagði m.a. að krafist yrði allra upplýsinga um Kaupþing banka í Lúxemborg. Líklega hefur hann ekki vitað að bankaleynd þar í landi er ein sú mesta í heiminum?

Hann vissi ekki heldur um hagsmunatengsl KPMG við Glitni, eða réttara sagt við helstu hluthafana í gamla Glitni, eða vissi hann kannski ekkert um hvaða endurskoðunarfyrirtæki væru að skoða gömlu bankana eins og aðstoðarmenn hans halda fram?

Þessi vanþekking hans er í sjálfu sér næg til að koma manninum úr embætti.

En þar sem hann er grunaður um græsku, þ.e. grunaður um að ljúga þessu öllu saman og reyna með fullyrðingum sínum að afvegaleiða almenning, þá er þess þá heldur ástæða til að krefjast afsagnar hans.

Ríkisstjórnin verður að fara að hreinsa til hjá sér ef hún vill halda einhverjum trúverðugleika eftir.

Því er krafan nú: Út með Björgvin, út! 

Fjármálaeftirlitið í Lúxemborg vill veita upplýsingar

Athugasemdir

[Sigurbjörg, 10.12.2008 kl. 20:45]

Hafa eigendur ekki aðgang að upplýsingum? og ef svo er þá hvers vegna ekki íslenska ríkið ?

[Torfi Kristján Stefánsson, 10.12.2008 kl. 21:28]

Íslenska ríkið á ekkert í þessum banka, ekki frekar en í öðrum "íslenskum" bönkum sem störfuðu í útlöndum, nema Landsbankanum í Hollandi og á Bretlandseyjum (og einhverjum bönkum í Skandinavíu ef mig minnir rétt). 

Auk þess má benda á að íslenska ríkið á jú "nýju" bankana hér á landi, en fær engar upplýsingar um starfsemi gömlu bankana vegna bankaleyndarinnar!

Þetta er einfaldlega blekkingarleikur hjá ráðherra, rétt eins og það var blekkingarleikur hjá formanni Viðskiptanefndar Alþingis, samflokksmanni áður nefnds ráðherra, þegar hann krafði bankana um upplýsingar (sem hann fékk ekki) og einnig Davíð Oddsson.

Það er leitt ef þú lætur slá ryki í augu þér, en svona er þetta nú bara.