Fær Ragnar þá loks tækifæri?

Val landsliðsþjálfarans á íslenska karlalandsliðinu í fótbolta hefur lengi verið gagnrýnt, nú síðast vegna þess að hann velur ekki Jóhannes Karl í liðið - sem þó spilar með ensku úrvaldsdeildarliði.

Reyndar er ég ekki endilega sammála þessu seinasta því Jóhannes Karl hefur ekki verið í byrjunarliði Burnley nú um nokkurt skeið - og því eflaust í slöku formi. Hins vegar eru rök Ólafs landsliðsþjálfara fyrir að velja hann ekki nokkuð sérstök (sjá frétt á visir.is í morgun). Rökin eru þau að Jóhannes á að hafa sagt í viðtalið að hann hafi ekki trú á því sem þjálfarinn er að gera - og þess vegna sé hann ekki valinn! Maður hefði haldið að það væri leyfilegt að gagnrýna þjálfarann án þess að eiga á hættu að vera settur út úr liðinu þess vegna. Já, það er vissara að halda kjafti þegar Ólafur er annars vegar!

En gagnrýnin á valinu á rétt á sér, sérstaklega hvað varðar menn sem hafa verið að spila lítið sem ekkert með félagsliðum sínum en eiga samt fast sæti í landsliðinu. Hermann Hreiðarsson er einn þeirra. Hann hefur ekkert spilað með Portsmouth nú í fyrstu leikjunum á Englandi í haust vegna meiðsla - en er samt valinn - og svo meiðist hann aftur.

Vonandi verða þessi forföll til þess að Ragnar Sigurðsson fái möguleika í byrjunarliðinu. Lið hans Gautaborg, er efst í sænsku deildinni og Ragnar fastur maður í byrjunarliðinu - og því í góðu formi.

Reynar er annar Íslendingur fastamaður í liðinu, Hjálmar Jónsson, og skoraði fyrsta markið í 3-0 sigri Gautaborgar yfir öðru sænsku toppliði, Elfsborg, sem Helgi Daníelsson spilar með (og átti stórleiki með í Evrópukeppninni - og fær vonandi að byrja inn á í leiknum nú á laugardaginn).

Hjálmar er hins vegar aldrei valinn í íslenska landsliðið núorðið þó svo að vinstri vængur liðsins sé veikasti hlekkur þess. Ætli honum hafi orðið það á að gagnrýna þjálfarann?

Svo er auðvitað kapituli út af fyrir sig að Birkir Bjarnason skuli aldrei fá tækifæri ...

Óvíst hvort Hermann verði með gegn Norðmönnum

Athugasemdir

[Ævar (IP-tala skráð) 2.9.2009 kl. 16:19]

Til hvers á Óli að velja mann í liðið sem hefur enga trú á sér? Algjörlega tilgangslaust og ef hann væri valinn myndi hann bara smita út frá sér neikvæðnina sem kæmi auðvitað bara niður á liðinu.

Jóhannes er topp leikmaður það verður ekki tekið af honum en ef ég væri ósáttur við landsliðsþjálfarann þá myndi ég ekkert láta það uppi, bara hugsa um að spila fyrir mitt lið,mína þjóð.